सामाजिक संस्थाका चुनावमा पार्टीको प्रतिनिधित्व गराउनेलाई रास्वपाले कारवाही गर्ने

राष्ट्रिय स्वतन्त्र पार्टी (रास्वपा)ले सामाजिक संघ संस्थाको चुनावी प्रतिस्पर्धामा पार्टीको प्रतिनिधित्व हुनेगरी सहभागी नहुन निर्देशन दिएको छ । 

जनस्तरका सामुदायिक संघसंस्थाको नेतृत्व छनौटमा हुने दलीय स्वार्थ प्रेरित प्रतिस्पर्धाको सदैव विपक्षमा रहेको भन्दै उसले कार्यकर्तालाई त्यस्तो निर्देशन दिएको हो । महामन्त्री एंव प्रवक्ता डा.मुकुल ढकालले आज विज्ञप्ति जारी गर्दै सामुदायिक संस्था स्थापना तथा सञ्चालनको उद्देश्य गैरराजनीतिक र समुदाय केन्द्रित हुनुपर्नेमा जोड दिएका छन् ।

त्यस्ता संस्थाहरुमा दलीय प्रतिनिधित्व गराउने कुसंस्कारको बाछिटा रास्वपामा पनि पार्न खोजिएको उनको आरोप छ । राजनीतिक दललाई आफ्नो सीमामा बाँध्नुपर्छ भन्ने सन्दर्भमा पार्टीले कुनै सम्झौता नगर्ने विज्ञप्तिमा जनाइएको छ । 

यद्यपि, पार्टीका सदस्य व्यक्तिगत रुपमा त्यस्ता गतिविधिमा सहभागी भएको हुनसक्ने भनेर बचाऊ पनि गरिएको छ । तर, व्यक्तिगत उम्मेदवारीका क्रममा पार्टीको संस्थागत प्रतिनिधित्वका रुपमा प्रचारप्रसार नगर्न, प्यानल बनाउने, भोट माग्ने तथा अन्य दलहरुसँग राजनीतिक अभिप्रायले समूह बनाएर विरोध, समर्थन, वक्तव्य नगर्न/नगराउन निर्देशन दिइएको छ । 

पार्टीको नीति विपरीत त्यस प्रकारको क्रियाकाप कुनैपनि सदस्यबाट गरेको वा गराइएको पाइए कडा कारबाही गरिनेसमेत रास्वपाले चेतावनी दिएको छ । 

हालै रुपन्देहीको सैनामैनामा 'सैनामैना खानेपानी तथा सरसफाई उपभोक्ता संस्था'मा नयाँ नेतृत्व चयनका लागि भएको निर्वाचनमा दलीय प्रतिष्पर्धा भएको थियो । चुनावमा रास्वपाका उम्मेदवारले अध्यक्ष जितेका थिए ।