राजीनामा नदिने मुख्यमन्त्रीको अडानविरुद्ध नयाँ सरकार गठनको तयारी

कोशी प्रदेश प्रमुख पर्शुराम खापुङले नयाँ सरकार गठनका लागि दाबी पेस गर्न आह्वान गर्नुभएको छ । मध्यरातमा जारी सूचनामा प्रदेश प्रमुख खापुङले मुख्यमन्त्रीका लागि दाबी पेस गर्न आह्वान गर्नु भएको छ ।

सूचनामा नेपालको संविधानको धारा १६८ को उपधारा (५) बमोजिम प्रदेशसभामा विश्वासको मत प्राप्त गर्नसक्ने कोशी प्रदेश सभाका सदस्यलाई भोलि अपरान्ह ५ बजेभित्र आफ्नो दाबी पेस गर्न आह्वान गरिएको छ ।

तर प्रदेश मन्त्रिपरिषद् बैठकले हिजै आगामी जेठ ११ गतेदेखि बजेट अधिवेशन बोलाउन प्रदेश प्रमुखलाई पुनः अनुरोध गर्ने निर्णय गरेको थियो । तर, महान्यायाधिवक्तासँगको कानुनी परामर्शपछि प्रदेश प्रमुखले नयाँ सरकार गठनको निम्ति आह्वान गर्नुभएको हो ।

यसअघि चैत २६ गते प्रदेशसभाका ५२ जना सदस्यले मुख्यमन्त्री केदार कार्कीलाई दिएको समर्थन फिर्ता लिएका थिए । वैशाख १० गते मुख्यमन्त्री कार्कीलाई ३० दिनभित्र विश्वासको मत लिन निर्देशन दिएको सङ्कल्प प्रस्ताव बहुमतले पारित भएको थियो ।

कार्की मुख्यमन्त्रीमा गत असोज २७ गते नियुक्त भएका हुन् । आफू नेतृत्वको सरकारले २ वर्षसम्म विश्वासको मत लिन नपर्ने र राजीनामा समेत दिन नपर्ने कार्कीको दाबी रहँदै आएको थियो ।