लमजुङका डेढ दर्जनले नेपाली नागरिकता त्यागे
लमजुङ स्थायी घर भई जागिर तथा व्यावसायको शिलसिलामा विभिन्न देशमा पुगेका १८ जनाले नेपाली नागरिकता परित्याग गरेका छन् । जिल्ला प्रशासन कार्यालय लमजुङले यस्तो जानकारी दिएको हो । जिल्लामा नागरिकता त्याग्नेको संख्या संवत २०७४ र २०७८ सालमा सबैभन्दा धेरै रहेको पनि पाइएको छ । उक्त समयमा पाँच-पाँच जनाले नागरिकता त्यागेका छन् ।
२०७३ सालमा २ जना, ०७५ सालमा एक जना, ०७९ सालमा २ जना र ८० सालको हालसम्म ३ जनाले नागरिकता त्यागेको जिल्ला प्रशासन कार्यालयका सूचना अधिकारी जगदीश मिश्रले जानकारी दिए । अन्य देशको नागरिकता लिनका लागि नेपालको छोड्नुपर्ने कानुनी व्यवस्था भएबमोजिम उनीहरुले दिएको निवेदनका आधारमा प्रशासन कार्यालयले निर्णय गरेको उनको भनाई छ ।
नागरिकता परित्याग गर्नेहरुमा लामो समयदेखि वैदेशिक रोजगारीका साथै डिभी र पिआर लिएर विदेश बसेका र विदेशी नागरिकसँग वैवाहिक सम्बन्ध कायम गरी बसेकाहरू छन् । त्यसैगरी नयाँ नागरिकता लिने भन्दा नागरिकताको प्रतिलिपि लिने धेरै रहेको पनि प्रशासन कार्यालयले जनाएको छ । आर्थिक वर्ष ०७९/०८० मा ६ हजार ४ सय ४५ जनाले नागरिकताको प्रतिलिपि लिएका छन् । जबकी सोही आर्थिक वर्षमा नयाँ नागरिकता लिनेको संख्या ५ हजार ८ सय ७४ रहेको छ।
अघिल्लो आर्थिक वर्ष २०७८/०७९ मा ४ हजार ५ सय ५४ जनाले प्रतिलिपि लिएका थिए भने ७ हजार ५ सय ५८ जनाले बंशजको आधारमा नयाँ नागरिकता लिएको र चार जनालाई बैबाहिक अगिकृत नागरिकता वितरण गरेको जिल्ला प्रशासन कार्यालयको तथ्यांकमा उल्लेख छ ।
टिप्पणीहरू