विदेशमा बसेर स्वेदशका महिलाको चरित्रहत्या गरेका यादव विमानस्थलमा पक्राउ
मलेसियामा बसेर सामाजिक सञ्जालमार्फत महिलासहित नाबालिग बालिकाको चरित्रहत्या गर्दै आएका एक युवकलाई प्रहरीले पक्राउ गरेको छ ।
रौतहटको देवाही गोनही नगरपालिका–५, टिकुलियाका २२ वर्षीय हरिहरप्रसाद यादवलाई नेपाल प्रहरीको साइबर ब्युरोले आज नियन्त्रणमा लिएको हो । रोजगारीका लागि मलेसिया पुगेका उनले एक महिला र उनकी नाबालिका बहिनीसमेत सँगै भएको तस्बिर प्रयोग गरी सामाजिक सञ्जालमार्फत चरित्रहत्या गरेको उजुरीका आधारमा पक्राउ गरेको ब्यूरोले जनाएको छ ।
उजुरीलगत्तै अनुसन्धानका क्रममा उक्त प्रोफाइल विदेशबाट सञ्चालित देखिएकाले राष्ट्रिय, अन्तर्राष्ट्रिय समन्वय र सहयोगको आधारमा प्रहरीले यादवलाई मलेसियाबाट नेपाल फर्कने क्रममा त्रिभुवन अन्तर्राष्ट्रिय विमानस्थल, गौचरबाट नियन्त्रणमा लिएको बताइएको छ ।
पक्राउ परेका उनलाई विद्युतीय कारोबार ऐन, २०६३ अन्तर्गतको कसूरमा काठमाडौं जिल्ला अदालतबाट पाँच दिन म्याद थप गरी आवश्यक अनुसन्धान भइरहेको प्रहरीले जानकारी गराएको छ ।
टिप्पणीहरू